هڅوب د څه لپاره! د افغانستان بې‌پایه غمیزې، ناورینونو او بدمرغیو نه یوازې له موږ څخه خپلې مادي او معنوي هستۍ واخېستې، بلکې همدې ناخوالو له ډیرو افغانانو ټاټوبی هم واخېست او د کډوالۍ او جلا وطنۍ بې رحمه څپو د مور وطن له مهربانه غیږې د نړۍ کوټ کوټ ته خواره واره او بې‌کوره کړل. ډېرو له خپلو بدمرغیو څخه د خلاصون او د یوه هوساه ژوند لپاره سختو او مرګونو لارو ته غاړه ورکړه، خو ارمانونه یې نیمه خوا پاتې شول او ان د ځینو زلمیو جنازې د نهنګانو خوراک شوې او هغوی چې د لویديځ له شوره ډک او بوخت چاپیریال ته را رورسیدل دلته یوځل بیا له بیلابیلو کړاونو سره مخ شول. په دې دې نا اشنا چاپیریال کې که د ژوند په چارو ځان پوهول هنر دی، خو د خپل ملي هویت،کلتور او ژبې ژوندي ساتل بیا د هر چا فردي مسوولیت او مکلفیت دی. ښایي ستونزمنه وي چې د ورځني کاري ژوند ترڅنګ دا هرڅه هم وپالل شي، خو دا هم واقعیت دی چې که له خپل فرهنګ، ژبې او ملي ارزښتونو لرې پاتې شو، نو لرې نه ده چې دلته را لویېدونکي راتلونکي نسلونه د همدې ټولنې څخه رنګ واخلي او ورو ورو دا هرڅه ترې پردي شي. ملي ژبه، ملي هویت او فرهنګ د ملتونو د شناخت او پیژندنې تر ټولو مهم اصل دی او هرچاته بویه چې د دې اصل د خوندیتابه لپاره خپل برخه مسوولیت ادا کړي.که څه هم په ځینو اروپایي هیوادونو کې ځینو افغانانو دا واقعیت درک کړی او د همدې اصل د پاللو لپاره یې ځینې ګامونه اخېستې، خو په دې برخه کې لاهم اساسي کار نه دی شوی او دا تشه اوس تر بل هر وخت زیاته محسوسیږي. « هڅوب ټولنیز او فرهنګي خوځښت» د دې ټولو واقعیتونو په درک سره، دا ځل لاس په کار شوی او که د څښتن تعالی رضاوه په پوره هوډ به مخ په وړاندې ځي. نو دا دي د همدې هدف لپاره په جرمني کې د یوه باوري چتر په رامنځ ته کولو سره خپل فعالیت پیلوو. زموږ هڅه داده چې دلته د مېشتو افغانانو ټولې ستونزې په واقعي ډول سره درک کړو د هغوی ترمځ د یو پله په حیث او د جرمني هیواد له اړوندو ادارو سره د اړیکو له لارې ورته مناسبې حل لارې پیدا کړو.